Педагогтердің дәстүрлі тамыз кеңесі онлайн-форматта өтті
15 тамыз күні Ауылдық аймақтарды тұрақты дамыту қорының жобаларына қатысатын мектептерге арналған тамыз кеңесі өтті. Онлайн-форматтағы кеңесте бас қосқан мектеп басшылары мен мұғалімдер жалпы білім беретін оқыту және басқару мәселелерін кеңінен талқылап, нақты кейстер ұсынды.
Пленарлық отырысқа қатысқан Білім беру саласын тұрақты дамыту қорының директоры Данияр Тоқтарбаев «Powered by NIS ауыл мектебі» жобасы туралы айтып берді.
Мектеп педагогтері үшін 10 негізгі пән бойынша жеке секциялар дайындалды. Онда НЗМ-нің үздік жаттықтырушылары функционалдық оқу, креативті ойлау, математикалық, жаратылыстану-ғылыми, цифрлық сауаттылық пен зерттеу дағдыларын дамыту бағытындағы тәжірибелерімен бөлісті. Педагогтер қорытынды аттестаттаудың форматын таңдау мен пән тапсырмаларын әзірлеу бойынша бірқатар практикалық сессияға қатысты.
Сонымен қатар мектеп мұғалімдері «Назарбаев зияткерлік мектептері» ДББҰ ұйымдастырушыларынан білім беру мазмұны, бағалау жүйесі, оқыту мен үйретудің әдістемелері мен технологиялары туралы ақпарат алады.